Te mārama ki ngā pānuitanga Aromatawai Whare Tere
I muri i tētahi Aromatawai Whare Tere, ka tukua pea ki tō kāinga, whare rānei tētahi o ngā pānuitanga tae rerekē e toru, ki te whakamōhio i a koe he aha te mahi whai muri ake
Pānuitanga whero
Ko te tikanga o te pānuitanga whero, kāore e whakaaetia te tomo atu. Tērā pea he mōrearea nui ō tō whare ki te haumaru, te hauora me te oranga tūmatanui. Ko te mōrearea pea ko te whare tonu, ko tētahi atu whare tūtata, te pāhekeheke o te whenua rānei.
Tirohia te pānuitanga whero [PDF 60KB]
Pānuitanga kōwhai
Ko te tikanga o te pānuitanga kōwhai, he here anō kei runga i te kuhu ki tō whare, ā, kāore e āheitia te noho i roto, kāore rānei e whakaaetia te tomo atu ki te kore tētahi e āta mātakitaki, otirā me poto noa te wā, māna rānei he pakihi waiwai. Tērā pea i tūkinotia tētahi wāhanga, te katoa rānei o te whare, he mōrearea nui rānei tō ētahi wāhanga o te whare, ngā whare tūtata, te pāhekeheke rānei o te whenua.
Tirohia te pānuitanga kōwhai i konei [PDF 79KB]
Te pānuitanga mā
Ko te tikanga o te pānuitanga mā, he pai tonu te noho ki tō whare. Ehara i te mea kāore he tūkinotanga ki tō whare. Kia mataara ki ngā wāhi tūkino, ā, ka whakapā atu ki tō kaituku rīhi, kaiwhakahaere rēti rānei mēnā e rēti whare ana koe.
Tirohia te pānuitanga mā [PDF 61KB]
Ētahi atu mōhiohio mō ngā pānuitanga rerekē
Mēnā kāore i tūkinotia tō kāinga, whare rānei, engari tērā pea ka tūkinotia e tētahi atu kāinga, hanganga rānei e tūtata ana, ka aromatawaitia tō whare i runga anō i taua tūraru.
He mea nui kia kaua koe e raweke, e tūkino, e tango rānei i te pānuitanga i muri i te whakairinga, kaua rānei e kuhu ki tō kāinga ki te whiwhi koe i te pānuitanga kōwhai, whero rānei. Ina raweketia e koe te tohu, ka takahi koe i te Building Act, ā, tērā pea ka hāmenetia koe.
Tērā pea ka whakarite hoki ngā āpiha whaimana i ētahi āhuatanga e tika ana hei ārai atu i te tangata kia haumaru ai, ki te tiaki rānei i ngā kāinga me ngā whare. Ko ētahi o ngā āhuatanga nei, tērā pea ko te whakatū taiapa, ārai, ētahi atu āhuatanga hoki hei ārai atu i te tangata, kia kore ai rānei te whare, ngā para rānei e tūkino i te tangata. He mea nui tonu kia kaua koe e huri tuarā, e raweke rānei i ēnei āhuatanga.