Ngā mahi hanga whāiti (RBW)

He whakamārama mō ngā mahi hanga whāiti

Ko ‘Ngā mahi hanga whāiti' ngā mahi waiwai kia tika ai te hanga me te ārai huarere o te whare. Me mātua whakamahi he Kaihanga Whare Whai Raihana (LBPs) hei hoahoa, hei mahi hoki i ēnei mahi.

Ka rēhitatia ngā LBP, ā, e herea ana rātou ki te whakarite kia hou tonu ō rātou pūkenga, ō rātou mōhiotanga hoki. Ka whai raihana ngā LBP mō ngā mahi ka mahia e rātou. I roto i ngā momo raihana ko:

• te hoahoa (design)
• te mahi kāmura (carpentry)
• te mahi tuanui (roofing)
• te tāpae pereki, paraka hoki (brick and blocklaying)
• te whakapiri ukatea (external plastering)
• ngā tūāpapa (foundations)
• te wāhi hanga (site).

He mea hira tō kōwhiringa kaihoahoa, kaihanga, ringarehe rānei i te mea kāore ngā kaimahi hanga katoa e whai raihana.

Hei wāhanga o tōna tukanga mō te tuku whakaaetanga me te tirohanga, ka hihiratia e ngā kaunihera te tautuku ki ngā ture mō te mahi hanga whāiti.

E ai ki te ture me mātua tuku e ia LBP e mahi hanga whāiti i tō whare he Tiwhikete Mahi Hoahoa, he Mauhanga Mahi Hanga rānei. Mā konei koe, otirā ngā kaipupuri o tō whare ā muri ake, e whakahaumaru mā te waihanga mauhanga nā wai ngā mahi hanga i tō whare, ā, te āhua o te whakatutuki i ngā Tikanga Hanga Whare.

Te awere kaipupuri-kaihanga

Ki te hiahia koe ki te mahi i te mahi hanga whāiti i tō kāinga (i tō kāinga hararei rānei), ka taea e koe te tono i tētahi awere kaipupuri-kaihanga mai i te kaunihera.

Ki te whai awere kaipupuri-kaihanga koe, kāore koe e hiahia ki te LPB ki te mahi, ki te tirotiro rānei i ngā mahi hanga whāiti.

Ngā mahi e herea ana

Ko te mahi hanga whāiti he mahi hoahoa, hanga, whakarerekē rānei i te whare noho ka:

• hiahiatia te whakaaetanga hanga, tērā rānei,
• he whare noho tūtahi paku i hangaia mā te whakamahi i te awere whare kaumātua (granny flats), ā, 
• ka whai wāhi hoki, ka pā rānei, ki ēnei wāhanga o te whare:
  • te hanganga matua
  • te ārai huarere
  • ētahi hoahoa ārai ahi.

I te nuinga o te wā, me whai LBP koe mō ngā mahi nui ake, mō ngā mahi matatini hoki.

Tirohia mēnā me whai whakaaetanga koe, ka āwhina pea i a koe ki te whakamahere i tō kaupapa ina he māmā tō kaupapa, e whakaarohia ana hei 'tūraru iti' rānei.

Ngā mahi e pā ana ki te hanganga matua o tō whare

Ko ngā mahi, hoahoa rānei e whakarerekē ai i te hanganga matua o tō whare he mahi hanga whāiti tērā. Ko ngā mahi ēnei e whai wāhi ki te ātetetanga o ngā kawenga poutū, huapae hoki.

He tauira ēnei o ngā wāhi e kitea ai ngā āhuatanga o te hanganga matua:

• Ngā tūāpapa me te anga o te papa o raro
  • ngā pou pūmau (me ngā tauteka)
  • ngā pātū tūāpapa
  • ngā pou anga poto
  • ngā pae hāpai papa
  • ngā pae hāpai ahopou
• Ngā papa
  • ngā hanganga papa
  • ngā pae pupuri papa
  • ngā hanganga papa hiato
• Ngā pātū
  • ngā pou anga
  • ngā pare
  • te hanganga mārō
  • ngā pou pūmau whānui
• Te tuanui
  • ngā heke
  • ngā pae pupuri tuanui
  • ngā anga tuanui
• Ngā poutoko me ngā pae hāpai
  • ngā poutoko
  • ngā pou rākau
  • ngā pou hāpai
  • ngā pae hāpai
• Ngā whakapūmau
  • te tāhei maitai whakapūmau, rākau whakapūmau rānei
  • ngā papa whakapūmau
  • ngā pātū kaupare
  • ngā papa kaupare

Ngā mahi mō te ārai huarere o tō whare

He mahi hanga whāiti ngā mahi, hoahoa rānei e whai ana ki te aukati i te wai, ki te whakamātua rānei i te mākū o te papanga o te whare. E karangahia ana hoki hei 'pūnaha whakahaere haukū o waho'.

He tauira o ngā pūnaha whakahaere haukū o waho me ngā wāhi e kitea ai pea ēnei:

• Te ārai haukū
  • ko ngā papa kōhatu i runga i te papa
  • papa-roto/papa whakatārewa me ngā pātū mārō ka noho whakaraerae ki te haukū i te hau,
  • ā, tae atu ki te parenga ārai-haukū
• Ngā kiriuhi o te tuanui/pātū me ngā pūnaha kiriuhi o te tuanui/pātū (kua āpiti atu ki te mata o waho o ngā pātū tāpare, pātū mārō rānei, tuanui rānei)
  • te tākainga hanga
  • ngā āpure kua whakamimititia
  • te kiriuhi
  • ngā taonga whakamau
  • ngā matapihi, ngā tatau me ngā mataaho
  • ngā pūhauhau
  • ngā āputa me ngā wāhi ngoto
  • ngā tāhei āraiwai me ngā herepuru
  • ngā hononga me ngā ūngutu
  • ngā kiritai parenga (hei tauira, te kiriuhi pītongatonga)
  • ngā parenga wai (ngā kiriuhi pītongatonga)
• Pītongatonga wai
  • te kiriuhi pītongatonga ki ngā pātū mārō me ngā tuanui e noho whakaraerae ana ki te haukū kei te hau
  • he papauhi pītongatonga ki ngā wāhi rahoraho/paparewa

Hoahoa haumaru ahi

Ka pā anake tēnei ki ngā wharenoho iti, āhua iti rānei tae atu ki ngā whare tāone.

Me whakahaere rawa te mahi hoahoa o ngā pūnaha haumaru ahi, me tirotiro rānei e tētahi LBP whai rāihana tōtika. Ka whakarite tēnei i te whakaurunga o ngā āraitanga pēnei i ngā pūnaha whakatūpato, ngā ara putanga me ngā whakatūpatotanga ārai i te horapatanga o te ahi ki roto i te hoahoa.

He tauira o ngā pūnaha haumaru ahi me ngā wāhi e kitea ai pea ēnei:

• Ngā pūnaha whakatūpato ohotata
  • ngā pūnaha whakatūpato ohotata aunoa, ā-ringa rānei
• Ngā pūnaha whakawātea me ngā pūnaha mahi ratonga ahi
  • ngā tatau me ngā matapihi autōhiko, aunoa rānei
  • ngā pūnaha rama ohotata
  • te mana ararewa ratonga ahi
  • ngā ara putanga
  • ngā putanga whakamutunga
  • ngā tohu
  • ngā takatakai ngongo wai ahi
  • ngā wehenga ahi
  • ngā wehenga auahi
  • ngā wāhi rerenga
• Ngā pūnaha kati, whakahaere rānei
  • ngā pūnaha aunoa mō te pēhi ahi
  • ngā pūnaha whakawātea hau ā-pūrere, hāngū rānei, ngā pūnaha whakahaere hau rānei
  • ngā pūnaha pēhanga
  • ngā pūnaha whakahaere auahi
  • ngā pūwhakaiti tōpana
  • ngā takatakai ngongo wai ahi
  • ngā pūnaha ngongo wai whare
  • ngā wehenga ahi, wehenga auahi
• Ētahi atu wāhanga o te hoahoa
  • te atanga ki ngā pūnaha
  • te pokapū pūnaha ahi
  • te pū hiko ohotata

Te tikanga o te 'whare noho'

Ko ngā ture e pā ana ki ngā mahi hanga whāiti e pā ana ki ngā mahi hanga ki tētahi whare, ki tētahi whare iti, āhua iti rānei.

Ko te whare he mea:

• he whare tū wehe noa, kua motu katoa, kotahi anō te wāhi kāinga.

Ko te whare noho iti, āhua iti rānei he whare e pēnei ana:

• e rua neke atu rānei ngā whare noho (wharenoho iti, whare tāone rānei), ngā wāhi wharenoho rānei (pēnei i te tomokanga, whare horoi, karāti, te aha atu)
• kāore he whare arumoni, whakaurunga arumoni rānei i roto
• he iti iho i te 10m te teitei mōrahi (te teitei poutū i waenga i te tihi o te tuanui - hāunga ngā hihi ihirangi, ngā timera, ngā pouhaki me ngā putanga - me te pūwāhi hahaka rawa o te papa).

Ngā mahi kāore ōna here

Ka kore te mahi e kīia he 'mahi hanga whāiti' mēnā ka pā tētahi, ētahi rānei o ngā āhuatanga e whai ake nei:

1. Mēnā ehara te mahi i te mahi ki te whare, ki te wharenoho iti, āhua iti rānei. Hei tauira, e kore te mahi ki ngā whare e whai ake nei i te mahi hanga whāiti:

• ngā karāti tū wehe
• ngā tauranga motokā
• ngā whare noho whāranu (pēnei i ngā whare me ngā toa i roto)
• tētahi whare arumoni ahakoa he aha te teitei
• tētahi wharenoho nui (i tua i te 10m te teitei)
• te whakauru i tētahi pūrere kapohau ā-whare
• te whakauru i tētahi puna kaukau ā-whare
• te whakauru i tētahi waka ā-taura ki te kāinga

2. Ki te kore āu mahi hanga whare e hiahia ki tētahi whakaaetanga hanganga i raro i te Schedule 1 o te Building Act 2004. Hei tauira:

• ngā tauranga motokā iti
• ētahi mahi turaki, tango rānei
• te whakatika me te tautiakitanga mā te whakamahi i ngā rauemi ōrite i te tūnga ōrite
• te whakarerekētanga o ētahi pātū ā-roto (ehara i te hanganga anga)
• te whakauru i te nuinga o ngā matapihi.

Kei Tirohia mēnā e hiahia ana koe ki ētahi whakaaetanga he mōhiohio āmiki ake.

3. Ki te kore āu mahi e pā ki te hanganga matua, ki te pākaha rānei o te whare ki ngā huarere. Hei tauira:

• te whakauru i ngā tāpiritanga akuaku hou i te wāhi kāore tētahi i reira i mua (pēnei i te kīhini hou, wharepaku tāpiri rānei)
• te whakauru i te pākai ahi tahu rākau
• te whakauru i ētahi atu pūnaha motuhake i ngā wharenoho iti, āhua iti rānei (pēnei i ngā pūoho auahi, ararewa rānei)
• te whakauru ārai whakamahana ki ngā pātū o waho o te whare.

4. Ngā mahi kāore e uru ana ki roto i tētahi o ngā momo raihana LBP. Hei tauira:

• te mahi taika o waho
• te hanga i ngā waehanga i tētahi atu wāhi (pēnei i ngā tāpare kua oti kē te hanga)
• te hoahoa hanga (pēnei i te hoahoa o tētahi pūnaha pūoho ahi).

Kia mahara me tutuki i ngā mahi hanganga katoa i Aotearoa ngā paerewa mahinga o te Tikanga Hangahanga – ahakoa e herea ana, kāore rānei, me whai rānei i tētahi whakaaetanga hangahanga.

Mēnā kāore koe i te mōhio mēnā he mahi hanga whāiti tō mahi, mā tētahi kaihoahoa whai raihana koe e āwhina, me kōrero atu rānei ki tō kaunihera.